დათუნიას ჩექმები » LoveMovies.Ge - ფილმები და სერიალები ქართულად
LoveMovies.Ge






დათუნიას ჩექმები


აღწერა:
დათუნიას ჩექმები / datunias cheqmebi

ერთხელ დათუნიამ ბლომად თაფ­ლ­ი მიირთვა, ხის ქვეშ წამოგორდა, ჩექმები გაიძრო და ტკბილად დაიძინა. როდესაც გაიღვიძა, ჩექმები ვერსად იპოვა, ვიღაცას მოეპარა. რაღას იზამდა, წამოდგა და ფეხშიშველი წაბაჯბაჯდა. დაკარგა ჩექმები და მორჩა, მათი ასავალ-დასავალიც ვერ გაიგო. დიდი არაფერი, ჯღანები იყო, მაგრამ ფეხზე კარგად ჰქონდა მორგებული და გული ამიტომ დაწყდა. ეჰ, აფსუს!.. კი დარდობდა დათუჩა თა­ვისი ჯღანების დაკარგვას, მაგრამ თან ხომ არ გადაჰყვებოდა. როგორც იქნა გულიდან გადაიგდო ჯავრი, რომ დახეთ, ახალი სადარდელი გაუჩნდა. ჭორები დაუყარეს და მთელ სოფელს მოსდეს: აქეთ ბებოს არაჟანი მოპარაო, იქით კეთილ ბერიკაცს ქათმები გაუწყვიტაო. არა და, დათუნიას უწინ ყველა პატივს სცემდა, ახლა კი ვინც გზაზე შემოეყარა ყველამ ზურგი აქცია. იქნებ ამ ცუდ საქციელს ვინმე სხვა სჩადიოდა და დათუნიას აბრალებდნენ? კი, ბატონო, მაგრამ "ფიცი მწამს და ბოლო მაკვირვებსო", ყველგან თაფლიჭამიას ჩექმების კვალი იყო, - ვაი, სირცხვილო და თავის მოჭრავ!

უგუნებოდ შეიქნა დათუნია, დადიოდა, მკერდზე თათებს იბრაგუნებდა და იფიცებოდა: - არაფერი ვიცი, მიწა გამისკდეს და თან ჩამიტანოს თუ მართალი არ ვიყო! მე ქურდბაცაცა არ ვარ. - მაშ ყველგან შენი ჩექმების კვალი რატომ არისო? - ბრაზობდნენ დაზარალებული სოფლელები. - ჩექმების კვალიო?! ვეღარ გაიგეთ, რომ რა ხანია ჩექმები აღარ მაქვს, დამეკარგა, ვიღაცამ მომპარა, - გაიძახოდა საწყალი დრუნჩა, მაგრამ ვინ უჯერებდა. - ნეტავი შენ, ბატონო დათუნია, - ანუგეშებდა ცბიერი მელია-კუდაგრძელია, - ჭორებს აჰყოლიხარ, ილაყბონ, რა გენაღვლება. ამდენი ნერვიულობისგან შეიძლება დასნეულდე. აბა შემომხედე, ჩემზე რას არ ყბედობენ, მაგრამ აინუნშიც არ ვაგდებ და აკი ფერზეც კარგადა ვარ და ხორციც მემატება.

მართლაც, ბოლო ხანებში მელია ისე გასუქდა და და­მშვენდა, მელიას უნახავი გახდებოდით. დათუნია კი დარდისგან დღითიდღე ხდებოდა, ამას ტყის ბინადარნიც ამჩნევდნენ და ეცოდებოდათ დათვი, რომელიც მთელი დღეები ბუნაგში იჯდა და გარეთ აღარ გამოდიოდა. ისე დასუსტდა, რომ წყლის დასალევადაც ძლივს დალასლასებდა. სოფელი კი ისევ აკლებული იყო, ვიღაც ღამღამობით ქათმებს იტაცებდა, ბაჭიებს დასდევდა, წიწილებს აფრთხობდა და თან დათუნიას ჩექმების კვალს ტოვებდა. ერთ დღეს ცხოველებმა გადაწყვიტეს, ქურდი დაეჭირათ. მურიას მოელაპარაკნენ და სოფლის განაპირას ბუჩქებში ჩაიმალნენ. როგორც კი დაღამდა, თვალი მოჰკრეს მელაკუდას, რომელიც ქურდულად მოიპარებოდა, შემდეგ სოფლისკენ მიმავალი გზის პირას ჩაცუცქდა, ტომრიდან დათუნიას ჩექმები ამოიღო, ჩაიცვა და საქათმისკენ მოუსვა.

პირველად მურია გამოვარდა სამალავიდან, მელაკუდამ გაქცევა სცადა, მაგრამ ჩექმები დი­დი ჰქონდა, სირბილში ხელს უშლიდა და შორს ვერ წავიდა. მურია ეცა, კუდში ჩაავლო პირი და დაითრია, ამ დროს სხვა ცხოველებიც მიეშველნენ და იმდენი ურტყეს მელაკუდას, რომ ძვალი და რბილი გაუერთიანეს. ქურდბაცაცა მელია სიმწრისგან ისე იგრიხებოდა, რომ თავისი ფუმფულა კუდი მოძვრა და მურიას შერჩა პირში. მერე დათუჩას ჩექმებიც წაიძრო ფეხიდან და ისე მოკურცხლა, რომ მის კვალსაც ვეღარავინ მიაგნო. მას შემდეგ ნაცემ-ნაბეგვი მელა ტყეში აღა­რავის უნახავს. ცხოველები ბოდიშის მოსახდელად შიმშილისა და დარდისგან დაუძლურებულ დათუნიასთან მივიდნენ, თან ხილი და კენკრა მიართვეს. გაიხარა დათუჩამ, რომ სიმართლემ თავისი გზა არ დაკარგა და თანაც თავისი ჩექმები იპოვა.filmebi qartulad
საიტზე განთავსებულია ფილმები, სერიალები, ტელევიზია, რომელთა ონლაინში ნახვა შეგიძლიათ LOVEMOVIES.GE-ზე

© 2018-2021

LoveMovies.Ge

filmebi qartulad animaciebi განათავსე ლინკი

რეგისტრაცია